భగవత్ గీత అధ్యయనం – పురుషోత్తమ ప్రాప్తి యోగం 10

శ్రీ కల్వకొలను చిత్తరంజన్ దాస్ స్మారక సేవా సంస్థ
భగవత్ గీత అధ్యయనం

ఓం శ్రీకృష్ణ పరమాత్మనే నమః

శ్రీమద్భగవద్గీత
15వ అధ్యాయం
పురుషోత్తమ ప్రాప్తి యోగం

యతంతో యోగినశ్చైనం పశ్యన్త్యాత్మన్యవస్థితమ్ |
యతంతోఽప్యకృతాత్మానో నైనం పశ్యన్త్యచేతసః || 11 ||

భావం: ఆత్మ సాక్షాత్కారం కోసం ప్రయత్నించే యోగులు తమ అంతరాత్మలో నిలిచి ఉన్న ఆ పరమాత్మను దర్శించగలుగుతారు;
కానీ చిత్తశుద్ధి లేనివారు లేదా అజ్ఞానులు ఎంత ప్రయత్నించినప్పటికీ ఆ ఆత్మతత్త్వాన్ని దర్శించలేరు.

పరమాత్మ ఇంతకు ముందే చెప్పినట్లుగా, కొద్దిమంది మాత్రమే ఆయనను ఆరాధించడానికి ప్రయత్నిస్తారు, వారిలో కొందరు మాత్రమే ఆయనను చేరుకోవడానికి కృషి చేస్తారు. అటువంటి ఆరాధకులలో కూడా ఒకటి లేదా ఇద్దరు మాత్రమే నిజంగా భగవంతుడిని తెలుసుకుని ఆయనను పొందుతారు. ఈ స్థితికి గల కారణం ఇక్కడ వివరించబడింది. చిత్తశుద్ధి, అనన్య భక్తి, ఇంద్రియ నిగ్రహం వంటివి ఆత్మతత్త్వాన్ని పొందడానికి కీలకం. సాధనను ప్రారంభించే ముందు ‘సాధన చతుష్టయం’ (నాలుగు రకాల సాధనా గుణాలు) ఆచరించడం అత్యంత ఆవశ్యకం. అంకితభావం, దృఢ సంకల్పం, స్వచ్ఛమైన హృదయం మరియు ధర్మబద్ధమైన జీవన విధానం లేని వారికి భగవంతుడు సాక్షాత్కరించడు.
తదుపరి నాలుగు శ్లోకాలలో, భగవంతుడు తన నివాస స్థానం యొక్క మహిమను వివరిస్తున్నాడు.

జై శ్రీకృష్ణ.
ధర్మో రక్షతి రక్షితః